Во каква форма пристигнува Ибрахимовиќ во Милан?

Вчера како бомба одекна веста за враќањето на Златан Ибрахимовиќ во редовите на Милан.

Швеѓанецот официјално ќе стане фудбалер на Милан во првиот ден од 2020 година, а на „Сан Сиро“ пристигнува како слободен играч откако му заврши договорот со Лос Анџелес Галакси.

Пред заминувањето за САД Ибрахимовиќ го носеше дресот на Манчестер Јунајтед две сезони. За Јунајтед последниот натпревар го одигра на 26.12.2017 година кога „црвените ѓаволи“ одиграа 2:2 против Барнли.

Во МЛС лигата Златан го докажа својот квалитет и постигна 53 гола на 58 натпревари. Во последните 12 настапи за Галакси постигна 15 гола што учинок за воодушевување.

Дресот на Милан Ибрахимовиќ го носеше од 2010 до 2012 година и за тој период освои една титула шампион на Италија и еден трофеј во италијанскиот Суперкуп.