Безобразна понуда со осум цифри го носи Марек Хамшик кај Лавеци!?

Безобразна понуда од осум цифри е пред капитенот на Наполи!

Таткото на Марек Хамшик тврди дека шансите неговиот син да се пресели во Кина ова лето се многу реални. Словакот е најдобар стрелец во историјата на Наполитанците, а ако остане во клубот и следната сезона му се потребни само уште 11 натпревари за да го надмине и рекордот по бројот на настапи.

Сепак, тоа не изгледа како сигурна работа бидејќи фудбалерот добил безобразна понуда од далечниот исток – 10 милиони евра по сезона!

„Интересот од Кинезите е сериозен, а преговорите не се лесни. Веќе три години Марек го отфрла предлогот за напуштање на Наполи, фокусиран беше на Скудетото, но клубот не ја исполни таа цел. Главниот проблем е преодниот рок, во Кина тој е на зима, а не сега, па прашање е кога овој трансфер би можел да се реализира“, изјави Ричард Хамшик, таткото на Словакот.

Сепак и покрај тоа Хамшик сениор тврди дека шансите за трансфер постојат.

„Клубовите имаа различни идеи, сезоната во Азија е во полн ек, а многу се лимитирани и по бројот на странци. Марек во Неапол има договор на уште три години, па поради тоа се е во рацете на неговиот агент и претседателот Де Лаурентис. Во овој момент шансите за заминување во Кина се 60-40%, а нашиот агент Јурај Венглош закаѓа преговори со претседателот на Наполи“, откри таткото на фудбалерот.

Хамшик сениор на крајот откри и дека на трансферот на Марек во Кина „работи“ и неговиот поранешен соиграч од Наполи, Езекиел Лавеци кој го носи дресот на Хебеи.