Арсенал го возвраќа ударот: На „Емирати“ пристигнува играч на Ливерпул

Откако Ливерпул минатата година го донесе Алекс Окслејд – Чемберлејн, а во последно време се повеќе се говори дека постои сериозен интерес за Арон Рамзи, сега медиумите тврдат дека се подготвува трансфер во обратна насока.

Имено, Арсенал е сериозно заинтересиран за левиот бек на „црвените“ Алберто Морено и ќе се обиде да го донесе на „Емирати“ во зимскиот преоден рок.

Договорот на Шпанецот истекува на крајот на сезоната, а со оглед на фактот дека не добива голема минутажа, самиот играч сака да ја промени средината уште во зимскиот преоден рок.

Поради тоа јануари е последна шанса за Ливерпул да заработи на неговото заминување, а Арсенал е спремен да плати симболична сума за 26-годишниот дефанзивец.

„Топџиите“ имаат проблеми на левата бековска позиција и во Морено гледаат идеално решение, но ќе треба да ја победат конкуренцијата бидејќи интерес за играчот покажува и Барселона.