Ѓуретановиќ: Имав трема пред трката, но ова е големо искуство

Младиот пливач Никола Ѓуретановиќ вчера настапи на 400 метри слободно на Олимписките игри во Париз.

Ѓуретановиќ има само 16 години и беше првиот македонски спортист кој се појави на игрите оваа година, а ја заврши трката со време од четири минути, пет секунди и 38 стотинки.

„Имав трема пред трката. И моите години го сторија своето. Бев многу возбуден. Сепак ова е големо искуство за мене. Секако, дека ќе се прикажам во подобро светло на следните големи натпреварувања“, изјави Ѓуретановиќ.

Следниот настап на македонски претставник во Париз е денес, кога на олимписката сцена ќе излезе стрелачката Анастасија Мојсовска во дисциплината воздушна пушка од 10 метри.