Ливерпул побара да биде објавена аудио снимката од разговорот на судијата од ВАР собата

Фудбалскиот клуб Ливерпул официјално побара објавување на аудио снимката од ВАР просторијата за време на поништувањето на регуларен гол постигнат од Луис Дијаз на саботниот натпревар против Тотенхем, објави британскиот јавен сервис Би-Би-Си.

Во 34. минута од оспорениот натпревар, при резултат 0:0, Дијаз постигна гол кој беше поништен по прегледот во ВАР просторијата, иако Колумбиецот не беше во офсајд.

Судиската комисија соопшти дека недозволувањето на голот било „значителна човечка грешка“, но во Ливерпул не се задоволни од тоа објаснување, па побарале да ја објават снимката од разговорот меѓу судиите кои донеле погрешна одлука.

Ливерпул загуби од Тотенхем со резултат 1:2, а мечот заврши со девет играчи, бидејќи беше исклучен Куртис Џонс во 26. минута и Диого Жота во 69. минута.

Ливерпул со победа во Лондон ќе станеше лидер во Премиер лигата, пренесува Танјуг.