Еурофарм Пелистер го чека нов натпревар во ЛШ: Германскиот вицешампион гостува во Битола

Eурофарм Пелистер утре го игра првиот натпревар на домешен терен во Лигата на шампионите, а противник ќе им биде екипата на Фуксе Берлин.

Македонскиот шампион одигра одлично во првото коло во кое беше достоен противник на силниот Пари Сен Жермен од кого загуби во Париз со 31:29.

„Подготовките одат во најдобар ред. Ќе играме против вицешампионот на Германија и една од најсилните екипи во Европа. За нас ова е нова шанса за докажување. Очекуваме полна сала и голема поддршка од публиката „Чкембари“. Со нив ќе се обидеме да го направиме тоа што не успеавме во првиот натпревар“, изјави голманот Никола Митревски.

Дуелот помеѓу Еурофарм Пелистер и Фуксе Берлин е на програмата утре во терминот од 20:45 часот.

„Би сакал натпреварот во Париз да биде само една најава за она што ќе следува в среда. Трибините да бидат полни и сигурен сум дека со нашиот осми, деветти играч можеме да повториме уште еден добар натпревар како тој во Париз и да се надеваме на поволен резултат, а тоа е победа“, изјави тренерот Ангеловски.