Видео: Бостон незадржлив, падна и шампионот!

Кошаркарите на Бостон Селтикс ја продолжија фантастичната серија и ја запишаа 14-та победа во низа и тоа против актуелниот шампион Голден Стејт (92:88).

Бостон и покрај негативата од 17 поени, мечот со Голден Стејт успеа да го однесе во неизвесна завршница. На 82 секунди до крајот Клеј Топмсон постигна поени за предност на Вориорс (88:86). Поените на Томпсон беа последни за Голден Стејт на мечот кој Бостон го заклучи со серија од шест коша. Вориорси до крајот имаа многу нереализирани удари, а Бостон поентираше од линијата за слободни фрлања.

Џејлен Браун со 22 поени и 7 скока беше предводникот на Селтикс, Ал Хорфорд оствари „дабл-дабл“ од 18 поени и 11 скока, а Кајри Ирвинг забележа 16 поени, 5 скока и 6 асистенции. Кај шампионот најрасположен беше Кевин Дурент кој постигна 24 поени.

Во вториот натпревар Хјустон лесно се справи со најлошиот тим во лигата, Феникс Санс. Рокетси славеа со 142:116, а мечот беше решен по првата четвртина во која Хјустон постигна 45 поени.

Дуелот го обележа и враќањето на Крис Пол во тимот на Хјустон, кој поради повреда не играше три недели.Тој одигра 20 минути и оствари „дабл-дабл“ од 11 поени и 10 асистенции. Феноменална партија имаше Џејмс Харден со 48 поени, 2 скока и 7 асистенции.