Балотели повеќе не е оној стариот: Имам две деца, лудувањето е минато

Контроверзниот италијански напаѓач Марио Балотели призна дека очекувал повик од селекторот за неодамна одиграните пријателски натпревари на репрезентацијата, сепак не го доби.

Балотели игра сосема солидна сезона во Ница и на вкупно 31 одигран натпревар постигна 22 погодоци. Неговиот проблем е што во овој момент Италија има одлични напаѓачи како Имобиле, Инсиње, Белоти...

„Супер Марио“ на сите начини се обидува да го убеди сојузот дека се променил и дека повеќе не е проблематичен.

„Да бидам искрен, очекував повик во репрезентацијата. Поискусен сум од порано, имам 27 години и две деца, времето во кое лудував е минато“, порача Балотели.

Поранешниот напаѓач на Интер, Манчестер Сити и Милан во текот на кариерата настапи на 33 натпревари за Италија и постигна 13 погодоци.