Роналдо: Не сакам кога луѓето ме лажат, фудбалот не е најважен

Кристиано Роналдо го најави натпреварот на Јувентус против Локомотив Москва во третото коло од Лигата на шампионите.

Јувентус се наоѓа на делба на првото место со Атлетико, додека рускиот тим има бод помалку, а на последното место е Баер Леверкузен без бодови.

Со евентуална победа Јувентус би направил голем чекор кон осминафиналето, а Роналдо ги откри клупските цели.

„Фудбалот е предизвик, а ние сакаме да освоиме се оваа сезона. Тука прво мислам на Серија А и Лигата на шампионите. Јувентус размислува само за најголемите работи, но одиме чекор по чекор. Најважен е колективот бидејќи кога тој функционира истовремено победуваме и ние индивидуално. Имаме нов тренер, некои нови играчи и уште се навикнуваме. Но задоволни сме со актуелната форма. Играме поинаков, офанзивен фудбал и напредуваме од ден во ден – на вистинскиот пат сме“.

Роналдо беше и меѓу тројцата кандидати на ФИФА за играч на годината, меѓутоа на крајот наградата ја однесе Лионеле Меси. Аргентинецот и Португалецот, заедно и со Ван Дајк е се борат и за Златната топка.

„Имав одлична сезона, добро ја започнав и оваа. Сакаме само да победиме утре и да се доближиме до осминафиналето. Тоа е за се што размислувам. Горд сум на рекордите, но сум фокусиран на тимот. Сакам да играм за тимот, да победувам и да освојувам трофеи, рекордите доаѓаат сами по себе“.

Новинарите го прашаа и што му пречи.

„Ми пречи кога луѓето не ја зборуваат вистината. Кога во прашање е фудбалот, тука немам големи замерки. Го прифаќам фудбалот таков каков што е, во него сум веќе 17 години. Меѓутоа фудбалот не е најважната работа. Имам семејство, деца…Тоа е најважното нешто“, изјави Роналдо.