Полициска акција во Торино: Уапсени навивачи на Јувентус

Италијанската полиција денес уапси лидери на 12 навивачки групи на Јувентус, пренесуваат италијанските медиуми.

Се работи за членови на главните ултрашки групи: „Други“, „Традиционе-Антики валори“, „Викинг“, „Нуклео 1985“ и „Ди Виа Филаделфија“.

Тие се обвинети за повеќе различни криминални дела, вклучувајќи уценување на клубот, перење на пари и насилство. Според изворите од полицијата акцијата не е завршена и се бараат повеќе личности низ цела Италија.

За време на сезоната 2017/18, тимот откажа некои од привилегиите на организираните навивачки групи, што доведе до нивно незадоволство. Фановите се обиделе да ги вратат своите придобивки, но без успех.

Тие посакале бесплатни билети за домашните мечеви на Јувентус, но откако биле одбиени, најавиле дека ќе започнат расистичка кампања, што може да резултира со многу сериозни казни за „Старата дама“.

Агенциите за спроведување на законот продолжуваат со акциите и во други градови покрај Торино. Се води истрага против 40 осомничени криминални организации.