Мурињо: Не си одам додека Јунајтед не ме избрка!

Менаџерот на Манчестер Јунајтед, Жозе Мурињо денес категорично ги демантираше шпекулациите дека може да замине од „Олд Трафорд“ на крајот на сезоната.

„Специјалниот“ нагласи дека уште долго време се гледа себе си како кормилар на Јунајтед и нема намера да замине се додека клубот не реши да го смени.

„Ако сакате директно да ме прашате дали се гледам во Манчестер Јунајтед и следната сезона, ќе ви кажам ДА. Уште кога пристигнав овде кажав дека ќе заминам само кога клубот ќе реши дека не сум повеќе потребен. Мојата цел е да останам и да работам за клубот да се врати таму каде што му е местото“, изјави Мурињо.

„Сакам да останам и не гледам причина зошто да не е така. Точно сум на средина од мојот договор. Ќе останам додека сопствениците и раководството се задоволни од мојата работа. Дали ќе потпишам нов договор тоа зависи од клубот, но јас сакам да останам и подолго од актуелниот договор“, додаде Португалецот.