Вчера нешто се случило: Икарди на трибини и против Лацио!

Мауро Икарди нема да игра во утрешниот натпревар за Интер против Лацио.

Аргентинецот изминатата недела се врати на тренинзите после еден месец отсуство, а италијанските медиуми тврдеа дека Икарди може да се најде на теренот веќе во натпреварот против Лацио.

Меѓутоа 26 годишниот напаѓач е изоставен од тимот, а тренерот Лучијано Спалети откри дека нешто се случило на вчерашниот тренинг и поради тоа нешто одлучил Икарди сепак да не игра.

„На некој начин изгледаше како во тимот да ни дошол нов играч. Не беше долго време со нас. Тренираше и моравме да го вклучуваме во режимот на тренинг. Вчера нешто се случи и морав да проценам и да донесам одлука. Ќе видиме како ќе биде за наредните натпревари“, изјави Спалети.

Така Икарди нема повторно да го гледаме во тимот. Спалети се одлучи да го игра и овој важен натпревар без капитенот, иако има проблеми со повредите.

Лаутаро Мартинез е повреден и поради тоа е надвор од тимот, па така сега главен кандидат да го започне натпреварот е Кеита Балде.

Ќе потсетиме, Икарди надвор од тимот е од моментот кога тимот му ја одзема капитенската лента и му ја додели на голманот Самир Хандановиќ. Аргентинецот тврдеше дека е повреден, но медицинските соопштенија на Интер го кажуваа спротивното.