Taжна вест од Аргентина: Почина поранешен светски шампион

Луис Адолфо Галван, поранешен фудбалски репрезентативец на Аргентина и член на шампионската генерација од 1978 година, почина во 78-та година по долгата борба со тешка пневмонија.

Галван беше хоспитализиран повеќе од еден месец поради компликации предизвикани од инфекција и пневмонија, а информацијата за неговата смрт ја потврди семејството.

Најголема трага во клубската кариера остави играјќи за Талјерес од Кордоба, каде што настапуваше од 1970 до 1982 година и повторно од 1986 до 1987 година.

Во текот на кариерата играше и за Лома Негра, Белграно од Кордоба, Централ Норте и Боливар. Фудбалскиот клуб Талјерес за кој одигра 503 натпревари се прости од Галван со порака на социјалните мрежи.

– Збогум, Луис. Со голема тага известуваме дека не напушти Луис Адолфо Галван, икона на клубот и светски шампион со Аргентина во 1978 година. Нашите мисли се со неговото семејство и најблиските. Почивај во мир – соопшти клубот.

Се огласи и Фудбалскиот сојуз на Аргентина.

– Федерацијата изразува длабоко жалење поради смртта на Луис Галван, дефанзивецот кој во 1978 година ѝ донесе светска титула на Аргентина. Беше столб на Талјерес, со дури 503 одиграни натпревари во текот на 17 сезони – наведено е во соопштението.