Сто милиони евра нема да и бидат доволни на Барса за Хулиан Алварес

Барселона може да ги насочи своите напори кон ангажирање на напаѓачот на Челси Жоао Педро, откако трансферот на главната цел Хулиан Алварес станува се потежок.

Според “Мундо Депортиво”, ѕвездата на Атлетико Мадрид долго време била приоритет за Каталонците во нивниот стремеж да ја засилат својата атака. Сега, меѓутоа, клубот е принуден да разгледа други опции поради компликациите околу зделката за Аргентинецот.

Се тврди дека „блаугранас“ биле подготвени да понудат околу 100 милиони евра за Алварес. Пари Сен Жермен, пак, е подготвен да издвои уште поголема сума. Од Атлетико Мадрид, изгледа, се помириле со фактот дека нема да можат да го задржат играчот, но претпочитаат да не го продадат на директен конкурент во првенството.

Во оваа ситуација, спортскиот директор на Барселона Деко го насочил своето внимание кон ангажирање на напаѓачот на Челси Жоао Педро. Каталонците веќе воспоставиле контакт со претставниците на Бразилецот и ќе вложат сите напори да го ангажираат, особено ако лондонскиот клуб не успее да се квалификува за европските клупски турнири оваа сезона.

Во тековната кампања на англиската Премиер лига, Жоао Педро одиграл 34 натпревари, на кои постигнал 15 голови и направил 5 асистенции.