Португалците од Манчестер Јунајтед дојдоа на „Енфилд“ во чест на Жота

Португалското трио на Манчестер Јунајтед патуваше до „Енфилд“ за да оддаде почит на Диого Жота и брат му Андре Силва.

Менаџерот на Јунајтед, Рубен Аморим, капитенот Бруно Фернандес и дефанзивецот Диого Далот поставија венец помеѓу стотиците цвеќиња и пораки пред стадионот на Ливерпул.

28-годишниот напаѓач на шампионите и 25-годишниот негов брат загинаа во тешка сообраќајна несреќа во Шпанија порано овој месец. Нивната смрт го потресе фудбалскиот свет и предизвика бран сочувство што ги надминува клупските ривалства.

И Фернандес и Далот присуствуваа на погребот на двајцата нивни сонародници во Португалија на 5-ти јули, по што добија дополнителни денови одмор од Манчестер Јунајтед. Двајцата беа дел од составот на Португалија, заедно со Жота, кој ја освои Лигата на нациите по победата над Шпанија на пенали во финалето.

Денес тројцата, облечени во темни облеки, положија венец од црвени и бели цвеќиња со натпис: „Почивајте во мир, Диого и Андре. Со најискрени сочувства од сите во Манчестер Јунајтед.“