Oва се најголемите губитници во квалификациите за Светското првенство: Во последното коло влегоа како лидери, на крај останаа и без бараж!

Африканските квалификации за Светското првенство завршија вчера, а дознавме кои се деветте групни победници, како и четири второпласирани тимови кои добија шанса за интерконтинентален бараж. Најголемите губитници во овие квалификации беа играчите на Бенин.

Фудбалската репрезентација на Бенин го отвори последното коло како водач на група Ц со 17 бодови. Јужноафриканската Република го следеше со 15 бодови, додека Нигерија беше на третото место со 14 бодови.

Бенин беше гостин на Нигерија и имаше шанса да се квалификува на Светското првенство за првпат во нивната историја. Победа носеше сигурен пласман, а во случај на нерешен резултат, им требаше Јужноафриканската Република да киксне дома против Руанда.

Но, Нигеријците ги совладаа со убедливи 4:0, а бидејќи и Јужноафриканската Република ја победи Руанда со 3:0, на крајот Бенин падна на третата позиција и остана без можност за интерконтинентален бараж помеѓу најдобрите во светот.

Така, Јужноафриканската Република директно се пласираше на Светското првенство, додека Нигерија доби втора шанса преку бараж.