Ѓоковиќ го урна големиот рекорд на Федерер и испиша историја!

Српската ѕвезда и овој понеделник остана меѓу петте најдобри тенисери на светот, рушејќи го еден од најимпресивните рекорди во овој спорт – оној на Роџер Федерер по бројот на недели поминати во Топ 5 на АТП листата.

Иако се зборува за неговата доминација веќе долг период, малкумина очекуваа дека овој рекорд, кој долго време се чинеше недостижен, ќе биде надминат. Ѓоковиќ сега е на врвот сам и со тоа уште еднаш го потврди статусот како еден од најголемите во историјата.

Новата АТП листа, што е објавена по турнирите во Барселона и Минхен, не донесе промени меѓу петмината најдобри. Ѓоковиќ остана четврти играч на светот, но сега достигна до бројката од 860 недели меѓу најдобрите пет – една повеќе од Федерер, кој до пред две недели го држеше рекордот со 859.

Ѓоковиќ прво го изедначи тој резултат, а сега и го надмина, дополнително зацврстувајќи ја својата позиција во историјата. Трет на таа листа е Рафаел Надал со 837 недели меѓу најдобрите пет.

На врвот на АТП листата сеуште е Јаник Синер со 13.350 поени, пред Карлос Алкараз кој има 12.960, додека Александар Зверев е трет со 5.255 поени. Ѓоковиќ е четврти со 4.710, а Топ 5 го затвора Феликс Оже-Алиасим со 4.100 поени.

Интересни промени се случија веднаш по нив. Бен Шелтон го освои турнирот во Минхен и ја зацврсти шестата позиција со 4.070 поени. По него следи Тејлор Фриц, кој го престигна Алекс де Минур за 25 поени и сега има 3.870. Лоренцо Мусети и Данијил Медведев го заокружуваат списокот на десетте најдобри во светот.