Наполи застана зад Алегри: Де Лаурентис бара одговор по лошата серија

Масимилијано Алегри ја има поддршката од раководството на Наполи, и покрај резултатската криза која го натера претседателот Аурелио де Лаурентис да побара разговор со тренерот и спортскиот директор Џовани Мана.

Во пресрет на домашниот натпревар со Бодо/Глимт во Лигата на шампионите, Мана за „Скај Спорт Италија“ порача дека тренерската позиција не е доведена во прашање. Сепак, јасно стави до знаење дека излезот од кризата мора да се бара на теренот.

Наполи сè уште ги чека првите бодови во елитното натпреварување по поразите од Арсенал и Вилјареал. Дополнителен удар беше саботното гостување кај последнопласираната Венеција во Серија А, кое заврши со пораз од 0-1.

Токму по таа лоша серија, Де Лаурентис вечерал со Мана и Алегри. Спортскиот директор објасни дека ваквите средби не се исклучок, но дека по два последователни порази претседателот природно сакал уверување за состојбата во тимот.

„Разговараме и кога победуваме и кога губиме. Сега треба помалку да зборуваме, а повеќе да работиме. Ни требаат бодови и вистинско издание на теренот“, беше пораката на Мана, кој нагласи дека во моментов фокусот мора да биде на европскиот предизвик, а не на Серија А.

„Нема никаква дилема околу тренерот“, истакна тој, додавајќи дека клубот бил свесен оти составот што му е ставен на располагање на Алегри има потреба од одредени корекции. Според него, за пресврт се неопходни поголема концентрација и континуитет, и во играта и во резултатите.

Дел од прашањата се однесуваа и на возраста на екипата. Наполи има највисок просек во Серија А и втор највисок во Лигата на шампионите, а во стартниот состав за Бодо/Глимт се седуммина фудбалери кои ја освоија титулата со Лучано Спалети пред четири години.

Мана, сепак, не прифаќа дека оваа група го достигнала својот крај. Ги посочи капитенот Ди Лоренцо, Рахмани, Политано и Лоботка како играчи за кои клубот нема причина да се жали, а оцени и дека просечната возраст кај други екипи понекогаш е значително намалена од присуството на неколку тинејџери.

Планот бил летово да пристигнат помлади фудбалери, но тоа не се реализирало. Подмладувањето останува задача за следниот преоден рок, додека актуелниот состав мора веднаш да одговори со резултати.