На Гигс му пропаднал бизнисот, сега има долг над пола милион евра!

Ресторанот George’s Dining Room and Bar, кој е во сопственост на поранешната ѕвезда на Манчестер Јунајтед, Рајан Гигс (52), пропадна минатата година, оставајќи долгови во износ од 563.600 фунти (648.000 евра), според новите документи објавени од The Sun.

Бизнисот се соочил со толкави финансиски потешкотии што компанијата не успеала да исплати ниту сметката од 22.000 фунти (25.000 евра) на сопствените ликвидатори. Гигс загубил 99.925 фунти (114.000 евра), кои ги инвестирал лично во работата што ја започнал во 2014 година заедно со школски другари, Келвин Грегори и Берни Тејлор, во Ворсли, во близина на Манчестер.

Списокот на долгови вклучува 75.616 фунти (87.000 евра) за даноци, 44.095 фунти (50.000 евра) за банкарски кредити и минусни износи на сметката, како и 28.302 фунти (32.500 евра) на неисплатени обврски кон вработените. Ликвидаторите порачаа: „Нема да има исплата на доверителите. Не се прибрале доволно средства за да се покријат дури и трошоците на ликвидаторите.“

Во март 2025 година се пишуваше дека вработените кои работеле во ресторанот добиле откази и не им биле исплатени платите. Кога решиле да го затворат ресторанот кој натрупувал загуби, вработените добиле порака во која било објаснето дека тоа е поради намалување на обемот на продажбата и зголемување на трошоците.

Неколку работници тогаш решиле да ја објават нивната приказна. Еден од помошните готвачи минатата година изјавил за The Sun: „Тоа беше целосно неочекувано. Требаше сите да работиме денес, а кога ги добивме пораките, бевме шокирани.“

Manchester Evening News тогаш разговараше со портпаролот на ресторанот, кој објасни дека имале голем проблем со ваучерите кои ќе останат неискористени. „Во моментов сме во процес на враќање на сите неискористени купени ваучери. Поголем дел од нив веќе се вратени, а во наредните денови ќе ги контактираме оние кои сè уште не се исплатени“, изјави тој.