Moдриќ по една сезона го менува бројот во Милан?

Лука Модриќ од наредната сезона би можел да го носи бројот 10 во Милан, но само ако Рафаел Леао го напушти клубот. Неколку навивачки страници на Милан ја објавија оваа можна ситуација, повикувајќи се на Спортиталија, но засега тоа останува во доменот на шпекулации. Трансферот на Португалецот сè уште не е договорен, а раководството на Милан не донело никаква официјална одлука за промена на бројот на дресот на Модриќ.

Леао во моментов го носи бројот 10, но неговата иднина на Сан Сиро не е целосно сигурна. Тој неодамна потврди дека разговарал со раководството на клубот за можноста за заминување и прифаќање на нови предизвици, додавајќи дека ќе ги разгледа понудите кои ќе ги добие. Исто така изјави дека ќе продолжи да се труди максимално додека е дел од Милан. Според Трансфермаркт, со вредност од 50 милиони евра, Леао е највредниот играч на Милан.

Кога пристигна во Милан во летото 2025 година, Модриќ го избра бројот 14 затоа што десетката веќе беше резервирана за Леао. Хрватскиот капитен тогаш го нарече португалскиот напаѓач сегашноста и иднината на клубот и не сакаше да го бара неговиот број.

Бројот 14 не му е непознат на Модриќ затоа што го носеше во раните делови од својата кариера, вклучувајќи настапи за Тотенхем и хрватската репрезентација. Сепак, најголемиот дел од својата кариера во Реал Мадрид го помина со бројот 10, кој стана еден од неговите заштитни знаци.