Мислеше дека има рак, спиеше во мала соба, а сега е на чекор да стане еден од најдобрите во светот

За неколку дена, поточно во ноќта помеѓу 17 и 18 август, во Чикаго ќе се одржи спектакуларниот UFC 319, а главниот настан на вечерта ќе биде борбата за титула во средна категорија помеѓу Камзат Чимаев и Дрикус ду Плеси.

За многу љубители на MMA спортот, ова е моментот што долго го чекаат, бидејќи Чимаев конечно е на прагот на најголемиот успех во својата кариера. Сепак, патот до овој момент не беше лесен. Познат по беспрекорниот стил на борба и неверојатниот атлетизам, Чимаев помина низ тешки животни фази, од кои една беше толку драматична што на кратко време помисли дека има рак.

Чимаев во 2013 година од Чеченија замина во Шведска, каде што се посвети на слободното борење и брзо се наметна како врвен натпреварувач во својата категорија. Неговите тренери истакнуваат дека во Калмар ги оставаше без шанса сите противници, а успеа да освои шампионски титули во дури две тежински категории.

Сепак, патот до професионалната MMA кариера беше непредвидлив. Паралелно работеше на фарма за живина и како обезбедување во ноќни клубови, а некое време живееше во мала соба во теретана со димензии еден на еден метар – со кревет и ноќна масичка. Во таа мала соба Камзат тренираше, жртвувајќи сè за да го оствари својот сон.

Фотографија: Instagram/Khamzat_chimaev