Македонските фудбалерки до 16 години ја победија и Грузија

Македонската женска фудбалска репрезентација до 16 години продолжува со одличните настапи на УЕФА развојниот турнир што се одржува во Албанија. Во рамките на второто коло, нашите млади фудбалерки обезбедија минимална, но вредна победа од 1:0 против врсничките од Грузија.

Херој на натпреварот беше Елена Наумовска, која во самиот финиш – 85. минута – ја затресе мрежата и ѝ донесе триумф на Македонија во еден мошне изедначен и борбен дуел. И двете селекции имаа свои шанси, но на крајот реши индивидуалниот момент на инспирација и одлучност.

Ова беше втора победа за нашата селекција на турнирот. Во првото коло, Македонија ја совлада Бугарија по подобро изведување на пенали, откако регуларниот дел заврши без победник.

Фото: ФФМ