Легендарниот Очоа заминува во пензија по кариера долга две децении!

Славниот мексикански голман Гиљермо Очоа објави дека ја завршува својата професионална кариера, ставајќи точка на успешната 22-годишна фудбалска авантура.

Очоа, кој минатата недела наполни 41 година, претходно најавуваше дека Светското првенство во 2026 година ќе биде негово последно, а сега и официјално соопшти дека се повлекува од фудбалските терени.

“Секогаш давав сè од себе. Се борев максимално и за клубовите и за репрезентацијата, а денес ги закачувам ракавиците. Да се биде голман значи да се подготви за моментот кога сè ќе биде на твоите рамените. Кога тој момент ќе дојде, не смееш да се двоумиш”, напиша Очоа на социјалните мрежи.

Ветеранот беше дел од мексиканскиот национален тим на шест светски првенства, што го става во една од редките групи фудбалери со таква достигнување. Како прв голман, беше на чело на репрезентацијата за Мундијалите во Бразил 2014, Русија 2018 и Катар 2022.

Неговата професионална кариера започна во 2004 година во клубот Америка од Мексико Сити, а по седум сезони премина во францускиот Ажаксио, ставајќи се на картата како прв мексикански голман кој настапувал во Европа.

Во својата европска кариера, го носеше дресот на Малага, Гранада, Стандард од Лиеж, Салернитана, АВС и АЕЛ од Лимасол, додека помеѓу 2019 и 2022 година се врати во Америка.

“Никогаш не можев да замислам до каде ќе ме однесе мојот сон. Денеска, со гордост можам да кажам: Ви благодарам. Го носам со себе грижливоста на милиони луѓе и мирот, бидејќи знам дека дадов сè за Мексико”, објави Очоа.

Последниот настап за репрезентацијата го запиша на Светското првенство во 2026 година, кога во завршницата на натпреварот од групната фаза против Чешка влезе како резерва. По крајот на натпреварот, емотивно се прости од репрезентативниот дрес со бакнување на стативите на стадионот Астека, местото каде што започна неговата професионална кариера.

На клупски план, тој ја освои титулата шампион на Мексико со клубот Америка и освои Куп на Белгија со Стандард од Лиеж. Со репрезентацијата на Мексико, шестпати стана победник на Златниот куп на КОНКАКАФ, а на Олимпијадата во Токио 2021 година освои бронзен медал.