Кунде ги дочека своите „пет минути“ и јавно понижи новинарка

Францускиот дефанзивец Жул Кунде реши да реагира откако шпанските медиуми објавија што наводно рекол на Џузепе Меаца кога Ханси Флик го внесе во игра Роберт Левандовски. Сепак, Кунде се огласи и директно ја прозва новинарката која тоа го објави вчера на социјалните мрежи.

Барселона во вторникот беше поразена во Милано од Интер со 4:3 во спектакуларното реванш полуфинале на Лигата на шампионите и не успеа да се пласира во финалето.

Каталонците водеа со 3:2 и беа чекор понапред кон финалето, но Интер преку Ачерби во 93-тата минута израмни на 3:3 и со продолжетоци, со голот на Фратеси, направи целосен пресврт и ја исфрли Барселона.

По натпреварот, во шпанските медиуми се појави интересна информација за Жул Кунде. Французинот го гледаше натпреварот од трибините бидејќи не беше во составот поради повреда, и наводно имал коментар кога видел дека Флик го внесе Левандовски во 91. минута.

„Не знам зошто игра, не е во состојба ништо да направи, не е целосно закрепнат“, наводно рекол Кунде според каталонското радио Каталуња што подоцна го пренесе и каталонскиот Спорт.

Сепак, се покажа дека тоа не е точна информација, бидејќи Кунде се огласи јавно за да го демантира тоа.

Покрај медиумите, тој директно ја „пецна“ и новинарката Лаиа Тудел која прва ја објави информацијата, а покрај Каталонското радио за кое таа работи, тоа го објави и каталонскиот Спорт, по што таа вест ја пренесоа многу медиуми.

„Измислување изјави и раскажување приказни е добро, но тоа не е новинарство. Новинарството исто така не е пренесување лажни информации како вистински. Сега слободно можете да го споделите овој мој твит“, порача Кунде.

Фото: Принткрин