
Антонио Конте не смета дека неговиот начин на работа бил причината поради која не ја добил клупата на Манчестер јунајтед. Италијанецот беше меѓу имињата што силно се поврзуваа со клубот, но по разделбата со Мајкл Керик минатата недела, изборот падна на Маурисио Покетино.
Во разговор за „Кронаке ди спољатоио“, Конте првпат се осврна на ваквиот расплет. Без ангажман е од летното заминување од Наполи, а не крие дека богатото минато на Јунајтед ја правело таа можност привлечна.
„Со толку значајна историја, не верувам дека Манчестер јунајтед би се плашел да доведе некого што може да изгради нешто важно и да го врати клубот таму каде што припаѓа. Не мислам дека проблемот би бил страв од моите методи“, порача Конте.
Пред новиот тренер стои тешка задача: во моментот на отказот на Керик, Јунајтед беше трет од дното на табелата. Клубот ја чека титулата во Премиер лигата уште од 2013 година, кога Алекс Фергусон ја заврши својата последна сезона на клупата.
Конте, кој со Челси стана англиски првак во 2017 година, со посебна почит зборуваше токму за легендарниот Шкотланѓанец.
„Огромно е моето почитување кон Алекс. Ја имам прочитано неговата книга, а додека го водев Челси ја имав честа да го посетам во неговиот дом“, откри Италијанецот.