Клоп за трансферот на Вирц: Ќе биде фантастично

Јирген Клоп го поздрави својот поранешен клуб Ливерпул за ангажирањето на германската ѕвезда Флоријан Вирц.

“Ова ќе биде апсолутно фантастично, сигурен сум во тоа”, изјави Германецот во интервју за RTL.

“Многу е тешко да се засили тимот кога си шампион. Но Ливерпул успеа. Тие потпишаа со извонреден талент како Флоријан Вирц. Со нетрпение очекувам да го видам. Ќе биде одлично”, додаде Клоп.

Ливерпул потпиша со 22-годишниот играч од вицешампионот во Бундеслигата, Бајер Леверкузен, а договорот со бонусите ќе чини околу 140 милиони евра. Вирц потпиша договор на пет години. “Црвените” ќе ја започнат одбраната на титулата во Премиер лига на “Енфилд” на 15 август против Борнемут.