Карегер: Победата на Ливерпул против ПСЖ е една од најголемите кражби некогаш видени во фудбалот

ФУДБАЛЕРИТЕ на Ливерпул ја победија екипата на Париз Сен-Жермен со 1:0 во првиот меч од осмина-финалето на Лигата на шампионите. На натпреварот во Париз, домаќинот имаше 71 процент од поседот на топката и 27 удари кон голот на англискиот тим и 14 корнери, а Ливерпул стигна до победа со единствениот удар во рамките на голот, оној на Харви Елиот во 87-та минута. Англичаните имаа вкупно два удари на целиот натпревар, кој го обележа нивниот голман Алисон со девет одбрани.

Ваквиот исход на натпреварот стручно го коментираше Џејми Карегер, играч кој целата кариера (1996-2013) ја помина играјќи за Ливерпул, нарекувајќи го “една од најголемите кражби што некогаш ќе ја видите во фудбалот”. “Не можам да поверувам што видов, ПСЖ беа неверојатни и целосно го надиграа Ливерпул”, истакна коментаторот на CBS и легенда на англискиот клуб.

Изведбата на Алисон ја опиша како “можеби најдобрата во неговата кариера, а секако најдобрата во дресот на Ливерпул. Ако Ливерпул ја освои Лигата на шампионите, а имаат добри шанси за тоа, неговата изведба ќе се памети со години”.