Joкиќ со уште еден блескав настап го одведе Денвер во конференциско финале! 🎥

Денвер нагетс е првиот тим кој обезбеди пласман во конференциското финале во НБА откако го победи Феникс изминатата вечер со 125:100 и така ја затвори серијата со 4:2.

Кошаркарите на Денвер одиграа фантастично прво полувреме во кое постигнаа дури 81 поен, а примија 51, па тука веќе беше најавено кој ќе слави.

Никола Јокиќ одигра уште еден одличен настап во кој постигна 32 поени, 10 скока и 12 асистенции. За српскиот кошаркар ова беше 11-ти трипл-дабл во плеј-оф натпреварите со што се изедначи со Џејсон Кид на вечната листа. Лидер во оваа категорија е Меџик Џонсон со 30.

Противник на Денвер ќе биде подобриот од серијата помеѓу Лејкерс и Голден Стејт каде што во овој момент Леброн и друштвото имаат предност од 3:2.

Можност за конференциско финале имаше и Филаделфија, но тие не ја искористија „меч топката“ и Бостон со победа од 86:95 изедначи на 3:3. Жоел Ембид запиша дабл-дабл од 26 поени и 10 скока, Маркус Смарт кај Бостон постигна 22 поени и седум асистенции.