Историска ноќ: Држава со помалку од 100.000 жители ќе има претставник во Конференциската лига

Историска ноќ за андорскиот фудбал се случи во четвртокот, кога Интер Ескалдес го обезбеди пласманот во лигашката фаза на Конференциската лига и стана првиот клуб од таа земја што ќе игра европска есен.

Интер Ескалдес на домашен терен ја угости косовската Дрита, а по 90 минути и продолженија немаше голови – 0:0. Одлуката за патникот во лигашката фаза падна по изведувањето на пенали, каде што андорскиот претставник беше поуспешен со резултат 4:2.

Со тоа Интер Ескалдес го постигна она што ниту еден клуб од Андора претходно не успеал – обезбеди настап во лигашката фаза на едно УЕФА натпреварување.