Гатузо најави заминување, па предложи нов тренер за Хајдук!

Хајдук беше блиску, а сега е далеку од титулата во Хрватска. 

Има три бода помалку од Риека, два од Динамо и само чудо во последните три кола може да ги одведе до титулата. Ѓенаро Гатузо го водеше овој тим цела сезона, а поради слабите резултати на крајот, титулата е далеку. 

“Можеби се повторувам, но… Дојдов во овој прекрасен град со насмевка и така ќе биде и кога ќе заминам”, рече Гатузо. 

“Овие 11 месеци беа тешки и во моментот кога ќе заминам многу ќе ми биде жал. Сретнав луѓе кои ми обележаа живот”, истакна италијанскиот тренер кој на овој начин го најави своето заминување. 

Интересно, има и предлог за нов тренер, а тоа е Марио Царевиќ. 

“Интересен е тренер. Играл во Хајдук и добро ги познава работите. За него можам да кажам само убави зборови. Тој е вистинскиот профил на тренер за Хајдук. И други тренери во ХНЛ ме изненадија”, рече Гатузо. 

До крајот на сезоната Хајдук гостува кај Горица, го пречекува Риека и гостува кај Шибеник, додека Риека покрај гостувањето на Полјуд, има и гостување кај Шибеник и меч против Славен Белупо дома. Најлесен распоред има Динамо кој игра против Славен и Вараждин дома, а гостува кај Локомотива.