Фудбалската федерација на Македонија се огласи по натпреварот од 10. коло во Првата МФЛ меѓу Шкендија Арачиново и Струга Трим Лум, на кој во 24. минута имаше ситуација што заврши со ВАР-интервенција.
Според објаснувањето на ФФМ, напаѓач на гостинскиот тим бил запрен со влечење и задржување во момент кога влегувал во јасна можност да стигне прв до топката и да се најде во очигледна шанса за гол. Одбранбениот фудбалер на домашниот состав, како што се наведува, задоцнил во реакцијата и со прекршок го спречил противникот.
Главниот судија првично не досудил ништо и дозволил акцијата да продолжи, но по проверката од ВАР собата бил повикан на преглед на снимката покрај теренот. По увидот, ја сменил првата одлука, досудил пенал и покажал директен црвен картон поради спречување очигледна шанса за погодок.
Од Федерацијата посочуваат дека во оваа ситуација протоколот бил целосно испочитуван и дека правилно биле применети правилата и за казнен удар и за дисциплинската мерка.
Во истото соопштение, ФФМ информира и за инцидент по натпреварот. Според нивните наводи, претставници на Шкендија Арачиново и неслужбени лица влегле во судиската соблекувална и упатувале навреди, вулгарности и закани кон судиите и официјални лица на Федерацијата.
ФФМ наведува дека случајот е внесен во записник и најавува поведување соодветна дисциплинска постапка пред надлежните органи.
Од Судиската организација и Федерацијата ваквото однесување е оценето како недозволиво и неспортско, со став дека притисоци и напади врз службените лица не можат да бидат оправдување, особено кога, според нив, станува збор за правилно донесени одлуки согласно правилата и ВАР-протоколот.
Учество во игри на среќа е дозволено за лица со 18+ години. Играј одговорно!