Бронза за Миљана Рељиќ во Кина!

По настапот и елиминацијата во четвртфиналето на Медитеранските игри, најдобрата македонска таеквондистка Миљана Рељиќ брзо се фокусираше на нов предизвик. Таа имаше одличен настап на Отвореното Светско првенство Г-4 во Таијуан, Кина, каде што освои бронзен медал.

Рељиќ настапи во категоријата до 62 килограми, во конкуренција на 43 таеквондистки, а до медалот стигна со три победи.

На стартот Македонката убедливо со 2-0 ја совлада домашната натпреварувачка Јијао Санг. Во следната борба беше подобра од Узбекистанката Мохидил Уктамјонова, која ја победи со 2-1. Место на пиедесталот Рељиќ обезбеди по уште еден триумф со 2-1, овојпат против претставничката на Тајпеј, Чиа Веи Ванг.

Бронзата од Таијуан носи и значајни бодови за македонската таеквондистка во нејзината борба за што подобар пласман на олимписката ранг-листа и обезбедување настап на Олимписките игри во Лос Анџелес во 2028 година.