Брегалница пак може да ги смени сопствениците – сега Германец се најавува за нов газда!

Според информациите на штипската телевизија „ТВ Стар“, фудбалскиот клуб Брегалница наскоро би можел да добие нови сопственици, и тоа само една година по последната промена во управувачката структура.

Како што објави „ТВ Стар“, на денешната седница на Советот на Општина Штип треба да се разгледува предлог за продажба на 51 процент од акциите на клубот на германски бизнисмен. Засега нема официјална потврда ниту детали за идниот сопственик, но според истите информации станува збор за човек кој веќе е вклучен во фудбалскиот бизнис и поседува клуб во Германија.

Брегалница пред нешто повеќе од една година премина во сопственост на поранешниот турски кошаркарски репрезентативец Мурат Шамил Шен. Тогаш беа најавени инвестиции не само во фудбалскиот клуб, туку и во кошарката во Штип, како и во индустриски капацитети, но најавените проекти не беа реализирани.

Во меѓувреме, штипскиот состав е блиску до враќање во Првата лига. На две кола пред крајот на сезоната во Втората лига, Брегалница е лидер на табелата со 65 бодови. За сигурен директен пласман во елитата, на тимот му се потребни победи во преостанатите два натпревари, со што нема да зависат од резултатите на конкурентите Скопје и Шкендија Арачиново.