Барселона ослабена во следните натпревари! Фудбалерот побара пауза: „Ментално сум исцрпен“

Роналд Араујо поминува низ тежок период. Од исклучувањето против Челси, но и пред тоа, тој чувствува дека не е во најдобра ментална и психолошка состојба.

Поради тоа, според информациите на МД од извори блиски до ситуацијата, одбранбениот играч на Барселона побара од клубот да му се даде време за ментално и психолошко опоравување од стресот низ кој минува.

Араујо е исклучително посветен играч, кој тоа го покажа не жалејќи се во ситуации кога беше на клупата, па дури и кога Ханси Флик го користеше надвор од неговата природна позиција стопер, дури и како напаѓач.

Токму поради тоа, Роналд смета дека е најчесно кон себе, тимот и клубот да побара време за опоравување.

Клубот се согласи на тоа без колебање бидејќи смета дека е најдобро играчот да ја поврати психолошката и менталната сила.

Оваа пауза е од неопределено времетраење бидејќи во вакви околности не може да се поставуваат рокови, но јасно е дека во физичка смисла уругвајскиот репрезентативец е добро.

Барселона му стави на располагање целосна поддршка, давајќи му го времето кое го бара и обезбедувајќи му психолошка помош која му е потребна.

Претседателот Лапорта јавно го поддржа минатиот петок од Андора, а исто така има и полна поддршка од Деко, директорот на фудбалскиот сектор, и тренерот Ханси Флик.

“Сакам да го охрабрам и да го бранам Араујо. Многу е критикуван и не сметам дека тоа е праведно. Тој дава сѐ на теренот, нашиот е капитен и сега мора да го преброди овој момент, бидејќи е многу емотивна личност со чувства.

Тешко му е и сакам да му кажам дека сме со него, дека мора да ја сврти страницата, бидејќи тука сите победуваме и сите губиме, и нема еден одговорен за поразите ниту за победите”, рече Лапорта.

Флик најави дека се работи за “приватна работа” и дека дефанзивецот моментално не е подготвен за игра.