Артета пред добивање на нов договор што ќе го стави меѓу најплатените тренери во светот

По освојувањето на Премиер лигата првпат по 22 години, Арсенал планира да го награди шпанскиот тренер со нов договор.

Микел Артета, кој ги предводеше „Топџиите“ до титулата во англиската лига после повеќе од две децении, се подготвува да потпише нов договор кој ќе го постави меѓу најплатените тренери на светскиот фудбалски пејзаж, откриваат англиските медиуми. Арсенал ја осигура титулата во вторникот, откако Манчестер Сити не успеа да го совлада Борнмут (1:1).

Со оглед на тоа што актуелниот договор му истекува летото 2027 година, преговорите за продолжување веќе се во напредна фаза и се очекува значително зголемување на заработката за шпанскиот стратег. Во моментов, Артета заработува околу 11,5 милиони евра годишно, плус пет милиони бонус за квалификација во Лигата на шампионите.

Новиот договор би можел да го доближи до платата на Диего Симеоне во Атлетико Мадрид, кој важи за најплатен тренер во светот со годишна плата од речиси 29 милиони евра.

Со пензионирањето на Пеп Гвардиола од Манчестер Сити на крајот на сезоната, кој заработува околу 23 милиони евра годишно, Артета ќе стане тренерот со највисока плата во Премиер лигата. Разговорите за новиот договор треба да продолжат по финалето на Лигата на шампионите следниот викенд.