Арсенал го „заврши“ првиот летен трансфер за 52.000.000 евра

Менаџерот на Арсенал, Микел Артета, даде „зелено светло“ за активирање на клаузулата со која Пјеро Инкапие (24) и официјално ќе стане играч на „топџиите“, пренесуваат англиските медиуми.

Еквадорскиот дефанзивец минатото лето пристигна во Лондон на позајмица од Баер Леверкузен за 6.000.000 евра, докажа дека вреди и Арсенал ќе го откупи кога ќе започне следниот преоден рок за цена од 52.000.000 евра.

Инкапие е универзален дефанзивец, може да ги покрие сите позиции во одбранбената линија, а Артета оваа сезона најмногу го користи на позицијата лев бек.

Ја искористи својата шанса додека Рикардо Калафјори беше повреден, се наметна во првите 11, а за викендот доби предност во однос на опоравениот Италијанец во дербито против Тотенхем, кое Арсенал го доби со 4:1.

Како дел од договорот за позајмица, веќе е усогласен петгодишен договор што Инкапие ќе го потпише. Германскиот клуб ќе задржи 10% од можен идни трансфер.

Овој фудбалер сега се надева дека на титулата шампион на Бундеслигата, која ја освои со Леверкузен пред две години, ќе ја додаде и титулата во Премиер лигата.