
Нико Паз доби признание какво што ретко добива млад аргентински фудбалер. Хуан Себастијан Верон смета дека асот на Комо поседува квалитети со кои може да се доближи до највисоките фудбалски дострели, а во неговата игра препознава потези што го потсетуваат на Лионел Меси и Диего Марадона.
Во разговор за „Газета дело спорт“, поранешниот играч на Сампдорија, Парма и Лацио ја истакна важноста Паз да го задржи професионалниот пристап.
„Нико Паз има неверојатен талент. Иднината му припаѓа нему ако продолжи да биде професионален како досега“, порача Верон.
Пофалбите имаат и статистичка поткрепа. Минатата сезона Паз ја заврши со 12 гола и седум асистенции за Комо, а во сезоната 2026/27 веќе има шест погодоци и осум асистенции на 14 клупски настапи. Во последните две сезони се издвои меѓу најдобрите во Серија А, а доби можност да се покаже и во Лигата на шампионите.
Неговиот подем се забележува и во репрезентацијата. За Аргентина постигна пет гола на пет натпревари оваа сезона и се вбројува меѓу главните кандидати за наследник на славната „десетка“ на Меси.
Сепак, Верон не ја изедначува блескавата перспектива со гаранција за кариера на нивото на двајцата великани. Тој потсети дека токму таквите споредби биле преголем товар за повеќе млади аргентински напаѓачи.
„На 22 години прави работи што сум ги видел само кај Меси и Диего Марадона. Не велам дека ќе го достигне нивното ниво и ќе одбележи една ера како нив, но Нико Паз има квалитети да се обиде. Му посакувам да успее“, истакна Верон.
Како особено силни страни кај фудбалерот на Комо, Верон ги издвои карактерот што го покажува на теренот и природноста со која ги создава акциите.