Битката на врвот во Втората фудбалска лига денеска продолжува со различни предизвици за водечката тројка: Охрид ќе игра пред своите навивачи против Камјани, додека Пелистер и Работнички ќе бараат бодови на гостински терен. Сите седум средби од 11. коло се закажани за 13 часот.
Охриѓани имаат 25 бода, еден повеќе од Пелистер, а Работнички е на 21 со натпревар помалку. Лидерот во дуелот на „Билјанини Извори“ влегува по три последователни победи без примен гол: 2-0 кај Македонија ЃП, 1-0 против Работнички и 3-0 на гостувањето кај Шкупи. Но, Камјани доаѓа охрабрен од триумфот од 3-1 над Тетекс во претходното коло.
Пелистер патува кај Кожуф по убедливите 6-1 против Детонит Плачковица. И домаќинот има победничка увертира, откако го совлада Еуромилк со 3-1. Дополнителна нишка во гевгелискиот дуел е Вангел Алтипармаковски: тренерот на Кожуф до пред неколку месеци беше дел од стручниот штаб на битолчани.
Работнички, пак, по победата од 3-1 против Беласица ќе се обиде да продолжи во ист ритам во Кочани. Осогово во последните два настапа покажа дека може да биде тежок противник: ја победи Брера со 3-1, а потоа одигра без голови на гости кај Македонија ЃП.
Во останатите пресметки Беласица е домаќин на Шкупи, Новаци игра против Македонија ЃП, Детонит Плачковица ја пречекува Брера, а Тетекс ќе се соочи со Еуромилк.
Следното коло носи домашни задачи за трите водечки екипи. На 21 ноември Пелистер ќе игра со Тетекс, Работнички со Новаци, а Охрид со Беласица. Камјани својот следен натпревар го има ден подоцна, против Еуромилк.
Фото: Архива
Учество во игри на среќа е дозволено за лица со 18+ години. Играј одговорно!