Луис Енрике посочи што мора ПСЖ да направи за да го запре Јамал

Луис Енрике смета дека ПСЖ ќе мора пред сè да го неутрализира Ламин Јамал ако сака позитивен резултат против Барселона во големото дерби од Лигата на шампионите.

Францускиот и шпанскиот гигант се среќаваат во вторник на „Паркот на принцовите“, во натпревар што многумина веќе го издвојуваат како најатрактивен во оваа фаза од натпреварувањето.

Барселона влегува во мечот во одлична форма. Тимот на Ханси Флик ги доби сите девет почетни натпревари во Ла Лига и има пет бода предност на врвот. Каталонците се први што успеале во таков старт уште од Реал Мадрид во сезоната 1968-69, а со 39 постигнати голови имаат втор најдобар голгетерски учинок по девет кола во историјата на лигата, зад Севилја од 1940-41 со 42.

Во центарот на вниманието е токму Јамал. Младиот офанзивец викендов против Бетис запиша гол и асистенција во победата од 5-2, со што стигна до вкупно 19 директни учества во голови сезонава во сите натпреварувања — девет погодоци и 10 асистенции. Според бројките, тоа е најдобар учинок меѓу фудбалерите од петте најсилни европски лиги.

Во Лигата на шампионите, 19-годишниот Јамал веќе има учинок од еден гол и четири асистенции на два натпревари, а на двата меча намести по два гола. Со тоа стана најмладиот играч кој врзал две последователни средби со најмалку по две асистенции. Единствено Раул во 2002 година успеал во три натпревари по ред да забележи по две или повеќе асистенции во елитното натпреварување.

Енрике на прес-конференцијата јасно стави до знаење колку го почитува квалитетот на Барселона и особено на Јамал.

„Најдобар начин да го запрете Ламин Јамал е да ѝ ја одземете топката на Барселона. Ако не ја добие топката, тогаш сè е помирно. Тоа би било идеално, но знаеме дека нема да биде лесно, затоа што е тешко да се игра и против Барселона и против Ламин Јамал.

Начинот да се браните против тим со таков квалитет е да бидете внимателни и да делувате како целина. Но не е само Ламин. Тука се и Рафиња, Педри. Имаат многу врвни играчи“, изјави тренерот на ПСЖ.

10 – Lamine Yamal es el primer jugador de las cinco grandes ligas de Europa que alcanza las 10 asistencias esta temporada entre todas las competiciones. También es el jugador de las cinco grandes ligas de Europa que ha participado en más goles en este curso entre todas las competiciones (nueve goles y 10 asistencias). Oro.

— OptaJose (@OptaJose) October 17, 2026

Тренерот на ПСЖ, сепак, не сакаше да оди предалеку со споредбите меѓу Јамал и Лионел Меси, нешто што често се провлекува откако младиот Шпанец дебитираше за Барса во 2023 година.

„Мислам дека Ламин сака да биде Ламин и засега тоа му оди многу добро. Напредува во секој сегмент од играта, но ако го споредувате со најдобриот играч на сите времиња, тогаш победникот е само еден.

Можеби во иднина ќе може да се зборува и за тоа, но во овој момент е најдобро да не се споредува со Меси“, додаде Енрике.

Ова ќе биде 17. меѓусебен натпревар меѓу ПСЖ и Барселона во големите европски купови. Францускиот клуб досега има биланс од шест победи, четири нерешени и шест порази. Тоа е израмнето најмногу натпревари што ПСЖ ги одиграл против еден противник во европските натпреварувања, исто колку и против Баерн Минхен.

Кога станува збор за ефикасноста, ова ривалство традиционално носи многу голови. Од дуелите што се играле најмалку 10 пати во историјата на Европскиот куп или Лигата на шампионите, само Ајакс – Баерн има повисок просек на голови по натпревар од ПСЖ – Барселона. Во нивните пресметки просекот изнесува 3,8 гола по меч.

Барселона, воедно, постигнала четири или повеќе голови на четири последователни натпревари во лигашката или групната фаза на ова натпреварување, што е рекорд во историјата на Европскиот куп и Лигата на шампионите. На другата страна, ПСЖ е без пораз на последните 12 меча во турнирот, со осум победи и четири ремија.

Енрике не ја криеше и личната емоција пред средбата со клубот во кој и играше и работеше како тренер.

„Фокусиран сум на нивниот квалитет. Играв за Барса и ја водев Барса, имам многу блиска врска со Каталонија.

Многу сум приврзан за Барселона, но сега сум тренер на ПСЖ. На почетокот ми беше тешко да играм против Барса, но се навикнав. Тие имаат врвни фудбалери и тим со вредности.

И покрај тоа, утре сакам да победам. Огромна мотивација ми е да се соочам со клубот што имал најголемо значење во мојата кариера“, порача шпанскиот стратег.

На прашањето дали овој натпревар наликува на финале кое дошло прерано, Енрике одговори дека форматот на натпреварувањето дозволува вакви големи пресметки уште во оваа фаза и додаде дека ПСЖ се гледа меѓу фаворитите, иако има уште неколку екипи способни да стигнат до трофејот.