Голем успех за македонското карате донесе Марко Џорлев, кој се искачи на светскиот врв на првенството за кадети, јуниори и У-21 во Бјелско Бјала, Полска.
Натпреварувачот од Штип, како дел од македонската репрезентација, во финалната борба беше подобар од Адам Ваги од Унгарија и славеше со 4:1 за златен медал.
По големиот резултат, неговите тренери Сашко и Жарко Арсовски од Карате клубот „Штип“ преку социјалните мрежи објавија дека Џорлев е нов светски шампион.
„Македонија има светски шампион, Штип има светски шампион, Карате клуб Штип има светски шампион. Радувај се Македонијо. Фала му на Господ за сѐ“, порачаа Сашко и Жарко Арсовски.
На успехот реагираше и градоначалникот на Штип, Иван Јорданов, кој посочи дека освоеното светско злато е гордост и за градот и за државата.
„Македонија слави, Штип се гордее! Нашиот Марко Џорлев е светски шампион. Освоеното светско злато е гордост за Штип, Македонија и Карате клубот ‘Штип’. Благодарност и до тренерите Сашко и Жарко Арсовски за нивната посветена работа и создавањето шампиони. Браво, Марко! Ти си пример дека со труд, дисциплина и посветеност се стигнува до светскиот врв“, истакна Јорданов.
Учество во игри на среќа е дозволено за лица со 18+ години. Играј одговорно!