Енцо Мареска има старт за паметење на клупата на Манчестер Сити. Со победата од 3:2 против Ипсвич на „Етихад“, италијанскиот стратег стана првиот менаџер во историјата на Премиер лигата кој победил на своите први седум натпревари на чело на еден клуб.
Иако станува збор за рекорд, Мареска не сакаше вниманието да биде насочено кон него. По мечот јасно порача дека најголемата заслуга ја имаат играчите, кои според него одлично реагирале на неговите барања и останале фокусирани и покрај случувањата надвор од теренот.
„Секако дека сум горд, но заслугата оди кај фудбалерите. Нивното внимание треба да биде насочено само кон луѓето во клубот. Тие не се оптоваруваат со оние што судат однадвор и создаваат проблеми. Во клубот се среќни и ја добиваат заслужената поддршка“, изјави Мареска.
Тренерот на Сити нагласи дека најмногу го радува секојдневниот напредок што го гледа кај тимот.
„Успеавме да врземе седум победи, но мене најмногу ме радува работата од ден во ден и тоа што гледам како играчите напредуваат. Денеска мислам дека го контролиравме натпреварот, создававме шанси и бевме добри и без топка. Тоа е најважно“, додаде Италијанецот.
Seven matches. Seven wins. A record-breaking @premierleague start for our boss! https://t.co/UKvIqXsPmr
— Manchester City (@ManCity) October 17, 2026
Со овој низ, Сити го задржа перфектниот почеток на сезоната. Подолги победнички отворања на една сезона во Премиер лигата претходно имале само Челси на Жозе Мурињо во 2005/06 со девет победи и Ливерпул на Јирген Клоп во 2019/20 со осум, а и двата тима на крајот стигнаа до титулата.
Во триумфот над Ипсвич, Ерлинг Халанд постигна два гола, додека Фил Фоден го отвори резултатот и стави крај на долгата голгетерска суша во Премиер лигата. Англичанецот немаше погодок на 23 натпревари, уште од дуелот против Кристал Палас во декември 2025 година.
Мареска не крие дека сака Фоден повторно да биде меѓу најдобрите во лигата.
„За Фил сум кажал многу пати, го познавам со години и за мене тој е еден од најдобрите играчи во Премиер лигата. Од првиот ден моја задача е да му помогнам повторно да биде на тоа ниво. Многу сум среќен поради неговиот гол и се надевам дека ова е само почеток“, порача тренерот на Сити.
Од таборот на Ипсвич, Гери О’Нил оцени дека неговиот тим покажал карактер, иако на крајот останал без бодови.
„Се обидовме. Има неколку работи што мораме да ги правиме подобро, а во вакви натпревари пресудуваат мали детали. Горд сум на групата. Не дојдовме за пораз и верувавме дека можеме до бодови, па нормално е што сме разочарани. Играчите дадоа сè од себе“, истакна О’Нил.
Учество во игри на среќа е дозволено за лица со 18+ години. Играј одговорно!