Баена ја спаси Атлетико во финишот: „јорганџиите“ го скршија Еспањол во 89. минута

Атлетико Мадрид стигна до нова важна победа во Ла Лига, откако со гол во самиот финиш го совлада Еспањол со 1-0 на стадионот „РЦДЕ“.

Херој за тимот на Диего Симеоне беше Алекс Баена, кој во 89. минута распали од работ на шеснаесетникот и ја смести топката во горниот лев агол за три бода вредни продолжување на победничката серија.

Домашниот состав долго одолеваше, а најзаслужен за тоа беше голманот Анхел Фортуњо. Чуварот на мрежата на Еспањол запиша пет одбрани и со низа интервенции го држеше својот тим во игра речиси до самиот крај.

Во првото полувреме немаше многу возбудувања, но Атлетико сепак се закани преку Џонатан Дејвид, чиј удар од тежок агол Фортуњо го оттурна во корнер.

По паузата притисокот на гостите стануваше сѐ посилен. Маркос Љоренте испрати силен удар, а Фортуњо со врвовите на прстите ја пренасочи топката во пречката. Потоа голманот на Еспањол го запре и новиот обид на Дејвид, а двапати успеа да го надмудри и Хулијан Алварез.

Особено впечатлива беше втората одбрана против Аргентинецот, кога по атрактивен удар успеа да интервенира и да исфрли зад голот. Сепак, во завршницата ниту тој не можеше да спречи капитулација.

Токму Алварез му ја намести топката на Баена пред шеснаесетникот, а шпанскиот фудбалер не погреши и со прецизен удар го реши натпреварот.

THREE POINTS IN BARCELONA  https://t.co/IhyxQbHJ76

— Atlético de Madrid (@atletienglish) October 17, 2026

Бројките покажуваат дека Атлетико заслужено стигна до триумфот. Гостите имаа 19 удари и xG од 1.34, додека Еспањол заврши со 10 обиди и xG од 0.53.

Баена влезе од клупата и за 28 минути остави силен печат: покрај победничкиот гол, креираше и две шанси. Со тоа стигна до вкупно седум директни учества во голови за Атлетико во актуелната сезона во Ла Лига — пет погодоци и две асистенции.

Тоа е за два повеќе отколку што имаше во целата претходна сезона, кога запиша два гола и три асистенции на 27 натпревари. Воедно, сега е на само два гола од својот личен рекорд во едно првенство, поставен со Вилјареал во сезоната 2024-25, кога постигна седум.

Свој удел во победата имаше и одбраната на Атлетико. Тимот на Симеоне не дозволи ниту еден удар во рамките на голот во првото полувреме, а на целиот меч Еспањол упати само два такви удари.

За Хулијан Алварез ова беше и прва асистенција во Ла Лига сезонава, иако напаѓачот сѐ уште го чека својот прв првенствен гол во сезоната 2026-27.