Арбелоа не паничи и покрај очајниот старт: Не чувствувам страв

Алваро Арбелоа тврди дека не стравува за својата иднина на клупата на Фулам, иако почетокот на сезоната за лондонскиот клуб е далеку под очекувањата.

Пред седмото коло во Премиер лигата, Фулам е последен на табелата со само два освоени бода и е еден од трите тима кои сè уште немаат победа сезонава, заедно со Тотенхем и Борнмут.

„Котиџерс“ во првите шест натпревари запишаа две ремија и четири порази, што е нивни најлош старт во Премиер лигата уште од сезоната 2020/21, кога во воведните пет кола имаа едно реми и четири порази. Само еднаш во клупската историја имале подолга серија без триумф на стартот на една прволигашка сезона – во 1951/52, кога не победија на првите седум меча.

Проблемите се гледаат и на домашен терен. Фулам нема победа ниту на првите три натпревари на „Крејвен Котиџ“ оваа сезона, со едно реми и два порази. Подолг таков негативен почеток дома имале само во сезоната 1966/67, кога не славеле на првите пет средби.

Дополнително загрижува и податокот дека Фулам веќе испуштил осум бода од водство во тековната сезона. Полош од нив во овој сегмент е само Борнмут, кој загубил девет бода од добиени позиции.

Сепак, Арбелоа не сака фокусот да биде ставен на неговата позиција.

„Фокусиран сум на моите играчи и на мојот тим. Тоа е најважно. Не се работи за мене, туку за клубот, за фудбалерите и за навивачите. Чекаме натпревар во кој добрата игра конечно ќе се претвори во резултат.“

Saturday at the Cottage. https://t.co/f7SV0GdNka

— Fulham Football Club (@FulhamFC) October 15, 2026

Шпанецот нагласи дека не чувствува страв и дека тренер не може да ја работи својата работа ако се води од такво чувство.

„Никогаш не се грижам за мојата позиција. Не чувствувам страв. Не можеш да бидеш тренер ако го чувствуваш тоа. Мора да работиш, да носиш одлуки и да им покажеш самодоверба на играчите.“

Тој додаде дека е задоволен од многу работи што ги прави тимот, иако признава дека резултатите во моментов не одат во прилог на Фулам.

„Не се работи за мојата позиција, туку за позицијата на Фулам. Тоа е најважно. Точно е дека одигравме само шест натпревари, но ни требаат бодови.“

Во следното коло Фулам го пречекува Хал Сити, а според пресметките на суперкомпјутерот на „Опта“, домаќинот има 55,8 проценти шанси да стигне до првата прволигашка победа сезонава.

Сепак, меѓусебниот биланс со Хал не му оди во прилог на Фулам. Лондонскиот тим има само една победа во последните шест премиерлигашки дуели против „тигрите“ (едно реми, четири порази), а таа единствена победа беше 2:0 на домашен терен во октомври 2009 година, во времето на Рој Хоџсон.