Елмас тргна фуриозно, Аталанта лесно го среди Пафос

Аталанта сигурно ја започна сезоната во Конференциската лига и на домашен терен славеше со 3-1 против Пафос. Вечерта во Бергамо почна идеално за тимот на Маурицио Сари, бидејќи Елјиф Елмас ја затресе мрежата уште во првата минута.

Македонскиот репрезентативец стрелаше по само 50 секунди игра, откако Џакомо Распадори испрати топка од десната страна, а Џанлука Скамака умешно ја пропушти за Елмас да реализира без притисок.

Atalanta open the scoring inside FIFTY seconds against Pafos ⚡️ 📺 Stream on TNT Sports & HBO Max https://t.co/TetmqYUPOn

— Football on TNT Sports (@footballontnt) October 15, 2026

Аталанта и пред овој меч имаше кадровски маки. Поради повреди недостасуваа Џорџо Скалвини, Франк Кеси, Камалдин Сулејмана, Исак Хин, Одилон Косуну и Раул Беланова, а воедно тимот влезе во натпреварот по победата од 3-1 над Венеција, со која беше прекината серијата од три порази во Серија А.

Пафос, пак, настапи без Николас Муми Нгамалеу, Давид Голдар, Џеј Гортер, Хараламбос Киријакидис и Жажа. За кипарскиот состав ова беше дуел по испаѓањето во квалификациите за Лигата на Европа од РБ Салцбург, а мечот донесе и средба меѓу Давид Луиз и неговиот поранешен тренер од Челси, Маурицио Сари.

По раното водство, Распадори се закани и со удар од дистанца, но Радослав Мајецки успеа со врвовите на прстите да исфрли во корнер. Наскоро Никола Залевски избори пенал, откако беше оттурнат одзади од Бруно Фелипе, а Распадори беше сигурен од белата точка за 2-0.

Сепак, веднаш по голот следуваше нов удар за Аталанта. Распадори почувствува болка и мораше да излезе поради мускулна повреда, а на негово место влезе Шарл де Кетеларе.

Пафос имаше добра можност да се врати преку Леле, кој излезе сам пред Марко Карнесеки, но шутираше покрај голот. На другата страна се закани и Скамака, а пред паузата гостите останаа и без Давид Луиз, кој излезе поради повреда на флексорот.

Аталанта до третиот гол стигна по уште една убава акција. Де Кетеларе одлично го пронајде Скамака, а напаѓачот по приемот рутински погоди од околу 14 метри за 3-0.

Во продолжението Залевски се закани со силен удар кој беше одбиен над пречката, а потоа негово додавање го исфрли Марио Пашалиќ во шанса, но Самy Ммае интервенираше во последен момент. Карнесеки во еден момент имаше и несигурна реакција по ударот на Андерсон Силва, но сепак успеа да ја скроти топката пред да ја мине гол-линијата.

Де Кетеларе можеше и самиот да се запише меѓу стрелците, но неговиот обид заврши малку над пречката. Проблемите со составот кај домаќините беа видливи и преку дебито на младиот десен бек Јависон Иделе, по што Залевски беше поместен во централната дефанзивна линија.

Пафос дојде до почесен погодок во финишот, кога по асистенција со гради Бјел шутираше под рацете на несигурниот Карнесеки и ги постави конечните 3-1.

Аталанта 3-1 Пафос
Елмас 1’, Распадори 18’ пен., Скамака 44’ / Бјел 88’