Малдини стана шеф на италијанскиот фудбал, па веднаш избра нов селектор

Андреа Пирло неочекувано се истакна како главен фаворит за клупата на италијанската фудбалска репрезентација, а неговото доаѓање наводно го поддржуваат Паоло Малдини и Леонардо, пишува „Газета дело Спорт“. Откако Италијанската фудбалска федерација го именуваше Малдини за технички директор, што е нова функција во структурата на Азурите, конечно започна да се работи на изборот на нов селектор.

Токму Малдини, со помош на својот советник Леонардо, ќе ја донесе конечната одлука за тоа кој ќе ја води Италија во Лигата на нации која почнува во септември, пишува „Фудбал Италија“.

Досега како главни кандидати за враќање на селекторската позиција се спомнувале Антонио Конте и Роберто Манчини, а во некои комбинации се спомнувал и Пеп Гвардиола. Но, со именувањето на Малдини на новата функција како технички директор, изгледа дека приоритетите се променети. „Газета дело Спорт“ тврди дека токму Пирло, светскиот првак од 2006 година, стана најсериозниот кандидат.