Замина во тишина: Светот му предвиде величенствена кариера, а Светското првенство му беше последниот танц

Постојат фудбалери за кои сите веруваат дека ќе станат светски ѕвезди. Веќе како тинејџери добиваат етикета „нов голем играч“, медиумите ги издигнуваат во небесата, а најголемите клубови вложуваат огромни очекувања.

Меѓу нив беше и Гаел Какута. Пред 16 години цела Европа зборуваше за неговиот талент, а многумина беа уверени дека токму тој ќе ја обележи една фудбалска генерација.

Какута во 2010 година беше еден од најдобрите играчи на Европското првенство за фудбалери до 19 години, на кое Франција го освои шампионскиот наслов.

Неговите одлични партии му донесоа статус како еден од најперспективните млади играчи на светот, а веќе тогаш го носеше дресот на Челси, каде што веруваа дека во своите редови имаат иднина ѕвезда на европскиот фудбал.

Сепак, кариерата не тргна по патот кој сите го очекуваа. Наместо да стане лидер на голем европски клуб, Какута со години менуваше средини во потрага по континуитет.

Играл за неколку клубови во Англија, Франција, Шпанија и Италија, покажуваше повремено блесоци на огромен талент, но никогаш не успеа да оствари кариера каква што му предвидуваа кога беше тинејџер.

Откако не дочека повик во сениорската репрезентација на Франција, одлучи да го облече дресот на Демократската Република Конго, земјата од која потекнува неговото семејство.

Во дресот на „Леопардите“ најде нова мотивација и стана важен дел од репрезентацијата. Дебитираше во 2017 година, а за ДР Конго одигра 31 натпревар и постигна пет голови.