Заврши норвешката бајка, Англија по 120 минути до полуфинале на Мундијалот! (Видео)

Англиската репрезентација успеа да се пласира во полуфиналето на Светското првенство, по драматична победа над Норвешка на натпреварот во Мајами. Во регуларното време резултатот беше 1:1, но Англија ја обезбеди победата во продолженијата со резултат 2:1.

Во полуфиналето, Англија ќе се соочи со победникот од натпреварот меѓу Аргентина и Швајцарија, кој почнува во 3 часот наутро според локално време.

Средбата започна внимателно од двете страни, без поголеми возбудувања во првите петнаесетина минути. Првата сериозна шанса ја имаше Англија во 19. минута, кога Џуд Белингам не успеа добро да ја зафати топката по центаршутот на Андерсон.

Во 36. минута, Норвежаните ги изненадија Англичаните. Андреас Шелдеруп се обиде да го пронајде Ерлинг Халанд во шеснаесетникот, но топката непредвидливо заврши во мрежата на Џордан Пикфорд за предност од 1:0 за Норвешка.
По преглед на ВАР поради можен фаул врз Кејн, судијата Клеман Турпин го потврди голот.

Во 44. минута, Норвешка пропушти огромна шанса да го заврши натпреварот во своја корист. Александер Сорлот и Халанд одиграа солиден напад, но напаѓачот на Атлетико беше себичен и акцијата остана без успех.

Англија израмни во судиското продолжение на првото полувреме. Ентони Гордон одлично му асистираше на Џуд Белингам, кој мајсторски ја пласираше топката зад грбот на голманот Њиланд за 1:1. Само две минути подоцна, Хари Кејн реализираше, но голот беше поништен поради офсајд.

Во второто полувреме, англискиот селектор веднаш ги внесе во игра Еберечи Езе и Букајо Сака, но Норвешка ја диктираше играта, откако Делкан Рајс беше принуден да го напушти теренот поради повреда.

Во 56. минута, Норвешка привремено се радуваше на водство откако Хегем ја смести топката во мрежата, но голот беше поништен по ВАР преглед за претходен фаул на Халанд над Андерсон.

Норвежаните продолжија со опасни напади, а најголемата шанса ја имаа во 76. минута, кога Патрик Берг изведе корнер, Пикфорд лошо реагираше, а Кристофер Ајер ја погоди пречката.

Во завршните минути на регуларното време, играта беше отворена. Прво младиот Антонио Нуса се обиде во 85. минута, но Пикфорд беше сигурен, а во 87. минута Англија беше близу до победа. Сака генијално се ослободи од чуварот и испрати остра топка во петерецот, но Аурснес одбрани спасувајќи ја Норвешка.

Со почетокот на продолженијата, натпреварот се претвори во вистинска драма. Во 93. минута, Њиланд со клупска интервенција го одбрани опасниот удар со глава на Хари Кејн. Веќе во следниот напад, Англија поведе.

Роџерс силно шутираше од 25 метри, Њиланд лошо одбрани, што го искористи неверојатниот Џуд Белингам и ја смести одбиената топка за водство од 2:1.

Англија имаше потоа колосална шанса да обезбеди победа во 99. минута, кога судијата Турпин покажа на белата точка поради контакт меѓу Боба и Спенс во шеснаесетникот.

Сепак, по долготрајно прегледување на ВАР снимките, францускиот арбитер ја отповика својата одлука откако беше утврдено дека Спенс симулираше прекршок и пеналот беше поништен.

На почетокот на второто продолжение, во 106. минута, норвешкиот селектор Солбакен направи изненадувачка промена, го извлече од игра Ерлинг Халанд додека на теренот влезе Странд Ларсен.

Англија во 110. минута имаше две сигурни шанси да го затвори натпреварот, меѓутоа Њиланд одлично бранеше. Прво го спаси ударот на Езе, а потоа со неверојатна интервенција го запре и обидот на Сака кој ја следеше одбиената топка, овозможувајќи Норвежаните да останат во игра.

Норвешка до последните секунди бараше израмнување, но резултатот остана 2:1 во корист на Англија, која се пласира во полуфиналето.