Марка: Готово е, Мурињо се враќа во Реал Мадрид!

Се чини дека враќањето на Жозе Мурињо во Реал Мадрид е неизбежно и само прашање на време.

Според извештаите на Марка, португалскиот тренер е единствениот останат кандидат за кормилото на “Кралскиот клуб”, и најверојатно ќе го наследи Алваро Арбелоа. Освен ако не се случи неочекуван и драстичен пресврт, Мурињо ќе стане четвртиот тренер на Реал за само една година, по Карло Анчелоти, Чаби Алонсо и привременото решение со Арбелоа.

Стабилност во соблекувалната

Изборот на Мурињо изгледа како најлогично решение. Иако се размислуваше и за имиња како Маурицио Покетино и Дидие Дешамп, предноста секогаш беше на страната на Португалецот.

Клубот се соочи со неколку инциденти, од караницата меѓу Орелиен Чуамени и Федерико Валверде, до судирот на Килијан Мбапе со тренерот Арбелоа по натпреварот со Овиедо во четвртокот. Ова ја зајакна убеденоста на раководството дека им е потребен тренер како Мурињо, кого го сметаат за единствениот способен да воведе ред во соблекувалната која, според медиумите, се претвори во “буре барут”.