Потврдена лоша вест: Барселона без Рафиња и во потенцијалното полуфинале на Лигата на шампионите

Капитенот на Барселона, Рафиња, се здоби со нова повреда на задната ложа поради што ќе мора да паузира неколку недели.

Како што пренесовме во петокот, Бразилецот почувствува болка во задната ложа која веќе двапати го спречуваше да игра оваа сезона и сега доживеа трета повреда во најлош можен момент. 

Сега е потврдено дека Рафиња ќе паузира минимум четири недели, возможно и до почетокот на мај, што значи дека ќе го пропушти четвртфиналето на Лигата на шампионите против Атлетико Мадрид, како и потенцијалното полуфинале против Арсенал или Спортинг. 

Исто така, Рафиња ќе ги пропушти и клучните натпревари во Ла Лига во борбата за титулата, гостувањето на Атлетико, градското дерби со Еспањол, доаѓањето на Селта на „Камп Ноу“, но добра вест е што сигурно ќе биде подготвен за второто лигашко „Ел Класико“ што е на програмата на 10-ти мај. 

Очекува се сега шансата да ја добие Маркус Рашфорд и да ја искористи на вистински начин, но не е исклучена можноста на левата страна по потреба да игра и Дани Олмо. 

Да потсетиме, во Барселона веќе се повредени Жил Кунде, Алехандро Балде и Френки де Јонг, но се очекува сите тројца да бидат подготвени за натпреварите со Атлетико во Лигата на шампионите, додека за првиот лигашки следната сабота можеби ќе бидат меѓу резервистите.