Лапорта пред неделните избори го спомена и Влаховиќ и откри што е клучно за Барселона

Претседателот на Барселона Жоан Лапорта говореше пред неделните избори за бројни теми, особено за засилувањата и при таа прилика ги демантираше гласините дека каталонскиот клуб преговара со Душан Влаховиќ.

Лапорта, во изминативе денови како и неговиот противкандидат Виктор Фонт, гостуваше во бројни емисии, а како и секогаш пред избори, засилувањата се една од главните теми и прашања.

Лапорта за разлика од претходните кандидатури, овој пат ги намали ветувањата и не е сигурен дека Барселона ќе доведува бомбастични засилувања.

„Постојано повторуваме дека не мора да доведуваме играчи само за да кажеме дека сме донеле некого. Она што е потребно е секоја сезона да го засилуваме тимот и да го правиме подобар. Тоа можеме да го направиме на повеќе начини, а еден од нив е, секако, доведување засилувања од странство. Ханси Флик и Деко се задолжени за тоа, тие знаат што му е потребно на тимот,“ рече Лапорта кој потоа одговори на прашањето за Душан Влаховиќ.

„Во медиумите во последно време често се појавува дека Душан Влаховиќ е поврзан со нас. Факт е дека неговиот договор истекува на лето, но нема апсолутно ништо помеѓу нас,” рече Лапорта.

Тој потсети дека Барселона не го решила финансискиот фер-плеј цели пет години, откако тој стана претседател.